شعر أو خواطر أبدويه

بسم الله من قلبي الصافي...ذكرت الله في مبدا الكلام

وصلاتي عليك يا مخلص ووافي...صلاة اتدوم بمر ليام

وطلبت الله والحال موش خافي...يجيب النصر ويعز لسلام

ونخّبر فيك وافهمهن اهدافي...وتو كلام يجبدلك كلام

نقول كلمات واجعلهن اخفافي...فيها ناس في غر ووهام

*فيها ناس عابده دفافي...ولا الكاط منقوش لكمام

تحب المال لو كان ف جيافي...وعبد المال كي عبد لصنام

وراه الكبر ع الساقط الهافي ...اكبر ذنب في دين لسلام

وكبرك ع المتكبرين انصافي...وكبرك ع المتواضعين حرام

طويل الدهر والدنيا اتكافي...مفيت الله مافيها مقام

مامن نجع كان مقصد اللافي...عز الضيف بانيله خيام

سياد القود نزالة العافي...وسياد الرّبد كي طير الحمام

لهم تاريخ ف ايام الصفافي...قوة عين وايديهم اسقام

*وكيف يحمسوا يقيموا الشعافي...يخشوا السوق لو تموا عرام

يخشوا السوق لوتموا مكافي...ويردوا المال بارواحا كرام

وشيخ النجع متواضع ودافي...وصغار النجع تابعين الكلام

توا وين رادمهم السافي...تموا تراب لله الدوام

ويوعظ فيك خالقهن اخلافي...بهت لرض من عام للعام

مرة ربيع منبوت الهفافي...خصيب العود نواره اكمام

ومره جداب عطشان الجفافي...ترق العزم ما فيها مقام

وين قارون وين ماله الضافي...وين فرعون من قبل للسلام


*-*-*-*-*-*-*-*-*-*-*-*